英國租屋，業主擔心欠租，審查租客信用資料，實為例行公事。至於有否刑事記錄，一般不太在意。
有次，一位本地青年，透過私人助理，申請租住，三房貴價物業。對方聲稱，銀行存款，過十萬鎊。年紀輕輕，收入不菲，引來好奇。我哋多事，結果一查，驚訝對方，五年之前，因藥駕及缺席聆訊，一直被曼城警方通緝。然而，另一資訊，卻係時隔一年，該名人士，已被定罪判刑。原來，佢係本地音樂人，薄有名氣，被緝一事，曾是網絡熱話。（雖已被捕判刑，曼城警方，通緝公告，保留至今，實在費解。）業主知悉租客背景，當然要求，另覓租客。
曾經，有位中東人士，申請租屋。第六靈感告知，個名非同凡響。又再多事一查，大鑊，個名竟係：國際恐佈組織，通緝要犯！個心頓時離一離，不過，及後發現，雖然個名唔係叫拉登，但同於早年，已證實被擊斃。租客大名雷同，實屬驚魂。
早前，本地報章報道，有位大哥，上機前24小時，突被航空公司，取消機位，指其早前，因在機上行為不檢，被列入黑名單。事主大呼冤枉，並向傳媒表示，曾經有日在家，無端端一眾特警，衝入屋內，將之制服於地，搞咗40分鐘，最終收隊離場。後來警方，出信道歉Sorrrrrrrrry，承認拉錯人兼點錯相。原來，佢唔單止同警方目標人物，同名同姓，而且同年同月同日生！
Photo credit: https://www.propertyreporter.co.uk/
Comments