進步社會接納不同族群

　　英國有唔少外來人口，值得欣賞之處，是社會對不同族裔的包容和接納度頗高。英國首相、倫敦巿長、甚至哈利王子妻子都係非白種人。之前同個地本人街坊吹開水，佢話英國人早幾代全球到處殖民，現在要接納唔同種族嘅外來人口，又係理所當然喎。在英國一段日子，我哋亦覺得就算本地人有時唔太明白我哋所講嘅英文，或者我哋聽唔明佢哋講嘅英文，多數人都仍然好有耐性，再次解釋。表面上唔會有「你返鄉下啦」之類嘅不屑態度。這點係值得學習和敬重之處。

　　但所謂「一樣薯仔養百樣人」嘅道理，我哋亦遇過本地律師講明唔做香港人買屋生意，原因係反洗黑錢條例，問多兩句就唔再應機。亦試過清楚表明買家資金來源全是香港工作收入及儲蓄，但對方卻堅持因為錢在中國，所以他們不能提供律師服務。真係「政治正確」到一個極點。這些律師的反應，唔知係無知， 定係心底裡帶有歧視態度，唔想做香港人生意。

　　另外有一次，去到一間出租屋安排睇屋，有個鄰居好好奇走嚟，問問間屋會租畀甚麼人。佢話小心租畀非洲某國嘅人。之後佢又指住另一間屋，話早前間屋本來租畀一對非洲該國夫婦，有一個小朋友，最後竟然住咗六個人。當然，佢又會話自己絕對唔係種族歧視，不過呢……不過？我明白嘅。

　　又有位相熟嘅中東人律師，吹開水， 佢就話自己都遇過一些不太公平嘅對待，可能因為自己膚色或種族原因啩。詳情對方沒有透露，但亦不難理解，有部分英國人，心裡仍存留白人優越感。非本地白人，有錢和社會地位，絕對唔代表可以加入上流社會俱樂部。

Photo credit: ekaterina79/Getty image/ CIO.com